Setemane de culture furlane 2020

La Setemanede culture furlane, rassegne che di agns e compagne la riflession su la storie, lis tradizions e l’identitât de nestre tiere, e torne ancje ta chest 2020 a proponi impuartants moments di partecipazion e di condivision su la realtât furlane di îr e di vuê. Il 2020 nol è stât un an facil, come che si sa, pe emergjence sanitarie dal coronavirus e o vin scugnût, par cheste reson, rimandâ lis manifestazions al mês di Otubar, rispiet al tradizionâl apontament di Mai. Une biele novitât però, propit par frontâ la pandemie, e je la pussibilitât di seguî la plui part dai events in direte e par vie telematiche, events ch’a saran ancje regjistrâts e a restaran a disposizion dal public dai interessâts. O vin pensât, par altri, di no limitâsi a une difusion locâl des manifestazions, ma ben di slargjâ la dimension de Setemane a nivel globâl, cu la partecipazion dal Ent Friûl tal Mont e de rêt dai Fogolârs furlans e des Fameis furlanis.

Ta chest 2020 o tignìn a ricuardâ, in maniere particolâr, l’inovâl di personalitâts ch’a àn lassât une olme profonde tal mont de culture e de societât furlane: Renato della Torre, ricercjadôr e musicolic, Gianfranco D’Aronco, pari dal pinsîr autonomistic, Ovidio Colussi e Riedo Puppo, scritôrs in marilenghe, Enzo Bearzot, alenadôr de nazionâl taliane di balon, Andreina Ciceri, studiose di etnografie, Pietro Someda de Marco, storic e scritôr, Jacopo Stellini e Antonio Zanon, benemerits dai studis regjonâi.

Il nestri agrât, di cûr, ur va ancje in cheste ocasion a ducj chei ch’a àn colaborât a meti adun une rassegne cussì interessant, cun iniziativis in presince e in rêt, une rassegne che si propon di dâ vôs a dut il mont de culture furlane, ore plui di simpri fuart e determinât a superâ chest moment di dificoltât.