Dleng Musiche classiche ma no masse

Pontade #1 Conciert “I 4 elements”

Prin apontament cul gnûf format che al viôt un imbinament, induvinât e inovatîf, tra la musiche classiche, la lenghe furlane e la valorizazion dal teritori. DLENG – musiche classiche ma no masse al è stât ideât par presentâ lis particolaritâts des piçulis citadinis e dai borcs dal Friûl Vignesie Julie, lûcs une vore biei e inmagants, dulà che tai teatris si esibissin realtâts teritoriâls virtuosis. In cheste pontade o larìn tal Teatri Zancarano di Sacîl par scoltâ la Academie di Arcs Arrigoni di San Vît dal Tiliment e la Orchestre San Marc di Pordenon. Nus compagnarà Igor Pezzi che, cuntune biele cjaminade tal centri storic dal “Zardin de Serenissime”, nus spiegarà par furlan lis carateristichis dai edificis plui biei e impuartants, cun cualchi menzon storiche, culturâl e architetoniche su chestis costruzions. Dopo, o jentrarìn tal Zancanaro dulà che, a spietânus tal foyer, o cjatìn un musicolic professionist, il prof. Marco Maria Tosolini. O comentarìn insiemi i tocs dal conciert “I 4 elements”. Di ogni toc si analizarà cualchi detai musicâl e storic, di mût di judâ il spetatôr a preseâ la esibizion sul palc e la particolâr tecniche virtuosistiche doprade.